സുരക്ഷിത മാതൃത്വത്തിലേക്ക് ഒരു ദശാബ്ദത്തിന്റെ മുന്നേറ്റം
ഇന്ത്യയിലെ ഗർഭിണികൾക്ക് ഗുണമേന്മയുള്ള പ്രസവപൂർവ ആരോഗ്യപരിചരണം ഉറപ്പാക്കുന്നതിനായി കേന്ദ്ര ആരോഗ്യ കുടുംബക്ഷേമ മന്ത്രാലയം 2016-ൽ ആരംഭിച്ച പ്രധാനപ്പെട്ട പദ്ധതിയാണ് പ്രധാൻ മന്ത്രി സുരക്ഷിത് മാതൃത്വ അഭിയാൻ (PMSMA). ഗർഭകാലത്തെ ആരോഗ്യപ്രശ്നങ്ങൾ നേരത്തേ കണ്ടെത്തുകയും സമയബന്ധിതമായ ചികിത്സയും വിദഗ്ധ പരിചരണവും ഉറപ്പാക്കുകയും ചെയ്യുന്നതിലൂടെ മാതൃമരണവും ശിശുമരണവും കുറയ്ക്കുകയാണ് പദ്ധതിയുടെ പ്രധാന ലക്ഷ്യം.
PMSMAയുടെ ഏറ്റവും ശ്രദ്ധേയമായ പ്രത്യേകത എല്ലാ മാസവും 9-ാം തീയതി സർക്കാർ ആരോഗ്യകേന്ദ്രങ്ങളിൽ പ്രത്യേക പ്രസവപൂർവ പരിശോധനാ സേവനങ്ങൾ ലഭ്യമാക്കുന്നതാണ്. ഗർഭിണികൾക്ക് ആവശ്യമായ പരിശോധനകൾ, ലബോറട്ടറി പരിശോധനകൾ, സ്കാനിംഗ്, വിദഗ്ധ ഡോക്ടർമാരുടെ സേവനം തുടങ്ങിയവ സൗജന്യമായി ലഭ്യമാക്കുന്നതിലൂടെ സാമ്പത്തികമായി പിന്നാക്കം നിൽക്കുന്നവർക്കും ഗുണമേന്മയുള്ള ആരോഗ്യപരിചരണം ഉറപ്പാക്കാൻ പദ്ധതി സഹായിക്കുന്നു.
ഗർഭകാലത്ത് ഉണ്ടാകാവുന്ന വിളർച്ച, ഉയർന്ന രക്തസമ്മർദ്ദം, പ്രമേഹം തുടങ്ങിയ ആരോഗ്യപ്രശ്നങ്ങൾ നേരത്തേ തിരിച്ചറിയുന്നതിന് PMSMA പ്രത്യേക പ്രാധാന്യം നൽകുന്നു. ഇതുവഴി ഉയർന്ന അപകടസാധ്യതയുള്ള ഗർഭധാരണങ്ങൾ (High-Risk Pregnancies) കൃത്യമായി കണ്ടെത്താനും ആവശ്യമായ തുടർചികിത്സയും വിദഗ്ധപരിചരണവും ഉറപ്പാക്കാനും കഴിയുന്നു.
പദ്ധതിയുടെ പ്രവർത്തനം കൂടുതൽ ശക്തിപ്പെടുത്തുന്നതിനായി Extended PMSMA സംവിധാനം 2022 മുതൽ നടപ്പിലാക്കി. ആശാ (ASHA) പ്രവർത്തകരുടെ സഹകരണത്തോടെ ഉയർന്ന അപകടസാധ്യതയുള്ള ഗർഭിണികളെ നിരന്തരം പിന്തുടരുകയും അവർക്ക് ആവശ്യമായ ചികിത്സ ലഭിക്കുന്നുണ്ടെന്ന് ഉറപ്പാക്കുകയും ചെയ്യുന്നതാണ് ഇതിന്റെ പ്രധാന സവിശേഷത.
ഒരു രാജ്യത്തിന്റെ ആരോഗ്യവികസനത്തിന്റെ പ്രധാന സൂചകങ്ങളിലൊന്നാണ് മാതൃ-ശിശു ആരോഗ്യം. ഗർഭിണികൾക്ക് സമയബന്ധിതമായ പരിശോധനയും പരിചരണവും ലഭ്യമാക്കുന്നതിലൂടെ സുരക്ഷിത പ്രസവത്തിനും ആരോഗ്യമുള്ള തലമുറയ്ക്കും PMSMA നിർണായക സംഭാവന നൽകുന്നു.
പദ്ധതി പത്താം വാർഷികം പൂർത്തിയാക്കുന്ന വേളയിൽ ഇന്ത്യ പോസ്റ്റ് പുറത്തിറക്കിയ പ്രത്യേക സ്മരണിക തപാൽ സ്റ്റാമ്പ്, സുരക്ഷിത മാതൃത്വത്തിനായി നടത്തിയ ഈ ദശാബ്ദകാലത്തെ പ്രവർത്തനങ്ങളുടെ ആദരസൂചകമായി മാറുന്നു. സ്റ്റാമ്പിൽ “9th of Every Month” എന്ന ആശയവും പ്രതിഫലിപ്പിച്ചിരിക്കുന്നത് PMSMAയുടെ പ്രത്യേക പ്രവർത്തനരീതിയെ ഓർമ്മിപ്പിക്കുന്നു.
സുരക്ഷിതമായ ഗർഭധാരണവും പ്രസവവും ഓരോ സ്ത്രീയുടെയും അവകാശമാണ്. ആ അവകാശം ഉറപ്പാക്കുന്നതിനുള്ള ഇന്ത്യയുടെ തുടർച്ചയായ ശ്രമങ്ങളിൽ PMSMAയ്ക്ക് നിർണായക സ്ഥാനമാണുള്ളത്. “സുരക്ഷിത മാതൃത്വം, ആരോഗ്യമുള്ള കുടുംബം, ശക്തമായ രാജ്യം” എന്ന ലക്ഷ്യത്തിലേക്കുള്ള ശ്രദ്ധേയമായ ചുവടുവയ്പാണ് ഈ പദ്ധതി.
ഹിമ .വി .മുംബൈ
