23
അറിയുകില്ലെനിക്കെന്തു പേർ ചൊല്ലുവാൻ
അന്ധകാരത്തിൽ ബന്ധങ്ങളുഴലുമ്പോൾ
അകലെയായിട്ടുമെന്നിൽ തെളിച്ചൊരാ
ആത്മബന്ധത്തിന്നംശു കിരണങ്ങളെ
നറുനിലാവായ് വീശുന്നു നിൻ പ്രഭ
കരിമുകിലുകൾ ചുറ്റും പരക്കുമ്പോൾ
ചിറകുനൽകുന്നു വീണ്ടും പറക്കുവാൻ
ഉയരെയകലെ കൂടണഞ്ഞീടുവാൻ
നെയ്തൊരുക്കിയ പട്ടു കിനാവുകൾ
ഉരുകുമഗ്നിയിലമരാൻ തുടങ്ങവേ
അകലെയായതാ കാണുന്നു നിന്നിലെ
ആത്മബന്ധത്തിന്നുറവയാം നീരിനെ
ക്ഷണിക മാത്രമാം ജന്മമെടുക്കുവാൻ
പാശമേന്തിയടുക്കും കാലാന്തകൻ
ശിഷ്ടമായൊന്നുമില്ലെനിക്കേകുവാൻ
നഷ്ട സൗഹൃദം തിരികെയേകട്ടെ ഞാൻ.
ദീപ ബിബീഷ് നായർ